Avante Ourense propón crear unha empresa pública de vivenda e pide máis control sobre os grandes propietarios
Avante Ourense presentou unha batería de propostas dirixidas ao Concello, á Xunta de Galicia e ao Parlamento autonómico co obxectivo de reforzar a intervención pública en materia de vivenda. A formación defende a creación dunha empresa pública municipal capaz de mercar, rehabilitar e xestionar inmobles, ademais de reclamar normas máis estritas fronte á acumulación de vivenda por parte de grandes propietarios.
O seu voceiro, Francisco Diéguez, sinalou que as administracións non poden limitarse a observar o mercado inmobiliario mentres o acceso á vivenda se complica cada vez máis. Segundo explicou, a formación aspira a un Concello que adquira, rehabilite e ofreza vivenda pública, comezando polas zonas máis deterioradas do Casco Vello, e a unha Xunta con maiores esixencias cara a quen concentra grandes carteiras de inmobles.
Unha empresa pública vinculada á Oficina Municipal de Vivenda
No ámbito local, Avante pide ao Concello de Ourense que poña en marcha a Oficina Municipal de Vivenda, unha medida xa incluída no documento 'Ourense Merece Máis', e que se estuden as vías para crear unha empresa pública municipal vinculada a ela. Este organismo permitiría ao Concello intervir de forma directa na compra, rehabilitación e xestión de vivenda asequible, coa fin de ir construíndo progresivamente un parque público municipal.
A formación propón que as primeiras actuacións se concentren no Casco Vello, mediante a adquisición e rehabilitación de edificios baleiros ou en mal estado, prestando especial atención aos puntos con maior deterioro, como a rúa Colón e a súa contorna. Ao seu xuízo, esta estratexia tamén contribuiría a recuperar poboación, actividade económica e patrimonio no centro histórico da cidade.
Medidas máis duras fronte aos grandes tenedores
A nivel autonómico, Avante trasladou á Xunta de Galicia unha proposta para endurecer de forma notable as ferramentas fronte á concentración de vivenda. Entre os seus plantexamentos figuran ampliar os dereitos de tenteo e retracto do IGVS cando grandes propietarios adquiran inmobles, aplicar unha fiscalidade autonómica progresiva máis esixente con quen acumula grandes carteiras e incrementar de forma substancial os incentivos para mobilizar vivendas baleiras.
Nas áreas declaradas como mercado residencial tensionado, a formación reclama aplicar coa máxima intensidade todas as ferramentas que permite a lexislación vixente, reforzando tanto a intervención sobre os grandes tenedores como a adquisición pública e a mobilización de vivenda baleira.
Estas mesmas propostas foron remitidas tamén ao Parlamento de Galicia, onde Avante pediu aos grupos parlamentarios que se posicionen e impulsen as reformas necesarias.
Con este conxunto de medidas, Avante Ourense reclama unha política de vivenda coordinada que combine intervención pública directa, rehabilitación, ampliación do parque público e maior control sobre a concentración inmobiliaria.