Baños de Molgas creará un listado oficial de vivendas en venda para facilitar a repoboación do municipio
O Concello de Baños de Molgas puxo en marcha unha iniciativa coa que pretende dinamizar o mercado inmobiliario local e favorecer a chegada de novos veciños e veciñas ao municipio.
O proxecto consistirá na creación dun listado oficial de vivendas en venda, que será empregado para dar a coñecer estas propiedades a persoas interesadas en instalarse no rural, a familias que buscan vivenda ou a proxectos vinculados ao programa “Baños de Molgas Vive”.
Desde o Concello explican que non é necesario realizar trámites complexos para incluír os inmobles nesta base de datos. As persoas propietarias só terán que achegar información básica e o propio Concello encargarase da súa difusión.
Para participar, solicítase facilitar un número de contacto, o tipo de propiedade e, se é posible, fotografías do inmoble. Tamén se pode realizar o proceso de forma presencial nas dependencias municipais.
Con esta medida, o Concello enmarca a iniciativa dentro das accións que xa está a desenvolver para atraer poboación ao municipio, destacando a necesidade de contar con vivendas dispoñibles para facilitar a chegada de novos residentes.