Barbadás continúa coa campaña de compostaxe doméstica cunha nova entrega de composteiros o 27 de xullo
O Concello de Barbadás continúa desenvolvendo a súa campaña de compostaxe doméstica co obxectivo de promover unha xestión máis sostible dos biorresiduos e fomentar hábitos responsables entre a veciñanza.
A próxima entrega de composteiros celebrarase o luns 27 de xullo, ás 12:00 horas, no Centro Empresarial Transfronteirizo, onde tamén terá lugar unha sesión formativa dirixida ás persoas participantes. Durante a xornada ofrecerase formación básica para aprender a compostar correctamente no fogar.
A iniciativa está dirixida especialmente ás persoas que dispoñen dun pequeno terreo, permitindo transformar os restos orgánicos en abono natural de alta calidade. Con esta práctica búscase reducir a cantidade de residuos que rematan no colector e avanzar cara a un modelo de economía circular máis eficiente no municipio.
O Concello facilitará de balde un composteiro aos fogares participantes, ademais da formación inicial e do acompañamento necesario para garantir unha correcta posta en marcha e seguimento do proceso.
Desde o goberno local avanzan que nas próximas semanas se organizarán novas sesións informativas noutros puntos do municipio, das que se informará a través das canles oficiais do Concello. A inscrición continúa aberta para todas aquelas persoas interesadas en sumarse á campaña.
A información sobre a iniciativa pode consultarse na páxina web barbadas.ocaminosostible.gal, así como a través do teléfono 647 521 464 ou do correo electrónico info@ocaminosostible.gal.
A campaña conta co apoio da Xunta de Galicia e co financiamento do Plan de Recuperación, Transformación e Resiliencia (Next Generation EU), e enmárcase na estratexia do Consorcio As Mariñas para impulsar un modelo de xestión sostible e de proximidade que implique á cidadanía na redución e valorización dos residuos orgánicos.