Cenlle acollerá II Travesía Solidaria a Nado NON-STOP a favor de ALCER Ourense
A Asociación Deportiva-Cultural EuNadoPorEles e PorElas presentou a segunda edición da súa Travesía Solidaria a Nado NON-STOP, unha iniciativa que volverá unir deporte e solidariedade e que nesta ocasión destinará a súa recadación a ALCER Ourense. A cita terá lugar o domingo 20 de setembro, a partir das 10.00 horas, no río Miño, na contorna do Hotel Balneario Laias Caldaria, no Concello de Cenlle.
A organización deseñou diferentes modalidades co obxectivo de facilitar a participación de persoas con distintos niveis e experiencias na natación en augas abertas e, ao mesmo tempo, dar visibilidade á realidade das persoas con enfermidade renal.
Na presentación participaron Felipe Iglesias, Rafael Tabarés e Toño Iglesias, en representación de EuNadoPorEles e PorElas, e Miguel Quintas, presidente de ALCER Ourense. No acto tamén estiveron presentes representantes das entidades colaboradoras, entre eles Ana Méndez, directora de Galicia Calidade; César Fernández, vicepresidente segundo da Deputación e alcalde de Ribadavia; Rebeca Sotelo, alcaldesa de Cenlle, e Fernando Suárez, xerente do Hotel Balneario Laias Caldaria.
A modalidade principal será a proba NON-STOP, na que cada participante terá como obxectivo completar o maior número posible de voltas durante o período de tempo escollido. Poderanse seleccionar percorridos de 2, 3 ou 4 horas de natación, tanto para participantes individuais como para equipos de relevos formados por un máximo de catro persoas.
Nos equipos, os participantes poderán distribuír libremente as quendas, aínda que en cada momento só poderá haber unha persoa nadando. Ademais, todas as persoas integrantes deberán completar polo menos unha volta ao longo do tempo asignado. Os equipos poderán ser mixtos.
A programación tamén incluirá unha categoría popular de 500 metros, de participación libre entre as 12.00 e as 14.00 horas. Esta modalidade está pensada para facilitar a participación de persoas que prefiran achegarse á iniciativa a través dunha distancia máis curta.
Os fondos recadados nesta segunda edición da travesía destinaranse ao programa “NutriALCER” de ALCER Ourense, que proporciona atención nutricional individualizada ás persoas con enfermidade renal a través dunha profesional especializada neste tipo de patoloxía.
O programa incorpora tamén obradoiros prácticos e materiais adaptados ás necesidades das persoas con enfermidade renal. Estes recursos facilítanse aos socios e socias da entidade e tamén se difunden mediante as canles de comunicación de ALCER Ourense.
A alimentación ten un papel relevante no coidado das persoas con enfermidade renal, polo que o acompañamento especializado permite ofrecer orientación adaptada ás necesidades individuais. Neste contexto, a organización de iniciativas solidarias como esta travesía contribúe ao mantemento do servizo e á continuidade dun programa orientado a mellorar o acompañamento e a calidade de vida das persoas con enfermidade renal.
O prazo de inscrición permanecerá aberto ata o 11 de setembro ou ata que se cubran as 125 prazas dispoñibles. As solicitudes atenderanse por rigorosa orde de inscrición e recepción dos datos.
As persoas interesadas poderán elixir entre as diferentes modalidades individuais ou por equipos. Ademais, quen queira colaborar coa causa sen participar na proba terá a opción de realizar unha achega a través da Fila Cero, cuxa recadación se destinará integramente a ALCER Ourense.
A información sobre as modalidades de participación, o regulamento e o proceso de inscrición pode consultarse na web de EuNadoPorEles e PorElas.
Desde ALCER Ourense agradeceron a EuNadoPorEles e PorElas a organización da iniciativa e a elección da entidade como beneficiaria, así como a colaboración do Hotel Balneario Laias Caldaria e do resto de entidades que participan na celebración da travesía.
A organización anima á cidadanía a participar nesta xornada deportiva e solidaria a través das diferentes modalidades ou contribuíndo á difusión da iniciativa, coa intención de que o 20 de setembro o río Miño sexa un punto de encontro entre o deporte, a solidariedade e o compromiso coas persoas con enfermidade renal.