Cenlle organizará este mes a II Travesía Solidaria
Laias Caldaria, no concello de Cenlle, será o escenario, o domingo 20 de setembro, da segunda edición dunha travesía a nado de carácter solidario, bautizada como 'EuNadoPorEles e PorElas'. A iniciativa, organizada pola asociación deportivo-cultural do mesmo nome, ten como obxectivo recadar fondos e apoio para ALCER Ourense, entidade dedicada ás persoas con enfermidade renal.
A cita combina deporte e solidariedade nunha xornada aberta tanto a nadadores que queiran participar de forma individual coma a quen prefira facelo en equipo. Para iso preváronse distintas modalidades de nado continuo, é dicir, sen paradas, con opcións de catro, tres e dúas horas de duración. As saídas destas probas non-stop están fixadas, respectivamente, ás 10.00, 11.00 e 12.00 horas.
Xunto a estas modalidades cronometradas, a organización habilitou tamén un circuíto de 500 metros pensado para un público máis amplo, no que cada participante poderá completar tantas voltas como desexe ou lle sexa posible, entre as 12.00 e as 14.00 horas.
Toda a información sobre o regulamento da proba, así como o proceso de inscrición, está dispoñible a través da páxina web da organización, www.eunadoporeles.es.
Desde o Concello de Cenlle trasladouse un convite á veciñanza para sumarse a esta xornada, que une práctica deportiva, compromiso solidario e convivencia veciñal.