Cortan o tráfico na OU-406 ao seu paso baixo a vía do tren en Ribadavia tras o choque dun camión guindastre
O tráfico quedou cortado na estrada OU-406, á altura do paso inferior baixo a vía do ferrocarril en Ribadavia, despois de que un camión equipado con guindastre quedase encallado por non respectar o gálibo permitido por esta estrutura, cuxa titularidade corresponde ao Adif. Tras o incidente, o administrador ferroviario revisou a ponte e constatou danos nunha das vigas de formigón que a sosteñen.
Ante esta situación, desprazáronse ata o lugar técnicos de infraestruturas, así como persoal da empresa responsable do mantemento da estrada. Traballando de forma coordinada coa Policía Local de Ribadavia, decidiuse cortar a circulación por motivos de seguridade no tramo comprendido entre os puntos quilométricos 0+380 e 0+480.
Operarios da empresa conservadora encargáronse de colocar a sinalización necesaria para advertir do corte, mentres se mantén a coordinación co Adif e co Concello de Ribadavia para xestionar a incidencia.
Para minimizar as molestias aos condutores, habilitáronse espazos en ambos os dous sentidos da vía onde os vehículos poden dar a volta. Ademais, estableceuse unha ruta alternativa: quen colla a saída 252 da autoestrada A-52 con destino ao centro de Ribadavia terá que desviarse pola N-120 ao seu paso pola Quinza.
Segundo se informou, o corte de tráfico permanecerá activo ata que o Adif complete a valoración definitiva dos danos causados e se leve a cabo a reparación da estrutura.