Cortes de tráfico en Taboadela o sábado e o domingo pola VII Subida a Taboadela
Esta fin de semana disputarase a VII Subida a Taboadela, unha proba que obrigará a establecer cortes de tráfico no acceso principal á localidade, en concreto no treito que vai dende a recta ata o alto de Taboadela, mentres dure a competición.
Os cortes aplicaranse en dúas franxas horarias: o sábado, aproximadamente entre as 13.00 horas e as 21.30 horas, e o domingo, entre as 07.30 horas e as 17.30 horas aproximadamente. Durante eses períodos non se poderá circular en vehículo pola zona afectada, aínda que si se permitirá o paso a pé.
En canto á piscina municipal, permanecerá aberta ao público durante toda a fin de semana, pero mentres dure o corte de tráfico só se poderá acceder a ela camiñando, sen posibilidade de chegar en coche.
Dende a organización insisten en que os horarios indicados son orientativos e poderían variar en función do desenvolvemento da proba, polo que piden aos veciños e visitantes paciencia ante as posibles molestias. Así mesmo, agradecen a colaboración de todos e fan un chamamento a desfrutar da VII Subida a Taboadela con responsabilidade, respectando en todo momento as indicacións de seguridade do persoal encargado do evento.