Deputación de Ourense e Cruz Vermella estreitan lazos para ampliar a atención aos colectivos máis vulnerables da provincia
O presidente da Deputación de Ourense, Luis Menor, reuniuse co presidente de Cruz Vermella en Ourense, Felipe Ferreiro, e con membros da xunta directiva da entidade para facer balance dos programas que ambas as institucións desenvolven conxuntamente e estudar novas fórmulas de colaboración para o vindeiro exercicio.
As dúas partes coincidiron en valorar de xeito moi positivo as iniciativas que están en marcha na actualidade, entre elas o programa dirixido á infancia "Promoción do éxito escolar", posto en marcha o ano pasado en varios puntos da provincia.
Menor salientou os bos resultados obtidos no primeiro ano deste programa e anunciou que a Deputación aumentará o seu respaldo económico para poder estendelo a máis beneficiarios. A institución provincial tamén contempla mellorar a achega destinada a cubrir as necesidades formativas expostas por Cruz Vermella.
No encontro abordouse igualmente o apoio provincial aos programas de xuventude, socorrismo e emerxencias, grazas ao cal Cruz Vermella conta con persoal técnico especializado que reforza o labor do seu voluntariado.
Así mesmo, tratouse a reposición dunha ambulancia da entidade que quedou totalmente inutilizada tras un accidente. O presidente provincial confirmou que a Deputación asumirá o custo do novo vehículo no vindeiro orzamento e traballará para axilizar a súa compra dentro do que permitan os trámites administrativos.
Menor lembrou que a relación entre ambas as entidades ten unha orixe común e unha longa traxectoria de colaboración, xa que Cruz Vermella xurdiu vinculada á Deputación e chegou a ter a súa sede en instalacións e terreos cedidos pola propia institución provincial. Por iso, reivindicou unha colaboración "estreita e permanente" cunha entidade que, segundo dixo, presta un servizo esencial á provincia e desenvolve un labor extraordinario a favor dos colectivos máis desfavorecidos.
Pola súa banda, Felipe Ferreiro agradeceu o respaldo mantido pola Deputación ao longo dos anos e destacou especialmente a vontade de planificar con antelación as actuacións de 2027. Segundo explicou, os compromisos mantéñense e existe disposición a melloralos na medida do posible, como vén ocorrendo cada ano. O responsable de Cruz Vermella en Ourense remarcou que esta colaboración permite soster numerosos servizos esenciais para a cidadanía e volveu agradecer o apoio continuado da institución provincial.