O Club Piragüismo Ourense triunfa na primeira regata provincial de piragüismo da Copa Deputación 2026
Preto dun cento de deportistas dos diferentes clubs da provincia participaron este domingo na primeira regata provincial de piragüismo, proba integrada na liga ourensá e na Copa Deputación de Ourense 2026.
A competición estivo organizada pola S.C.D.X Fontefría, de Muiños, e a Federación Galega de Piragüismo, coa colaboración da Deputación Provincial de Ourense e do Concello de Muiños.
A proba desenvolveuse finalmente no encoro de Salas, despois de que non puidese celebrarse no encoro das Conchas, como estaba previsto inicialmente. A xornada contou ademais coa presenza de numeroso público seguindo o desenvolvemento das diferentes probas.
Os percorridos variaron en función das categorías participantes. Os deportistas prebenxamíns, benxamíns e alevíns completaron un circuíto de 1.000 metros; os infantís afrontaron unha distancia de 2.000 metros, mentres que os cadetes realizaron un percorrido de 4.000 metros.
Na clasificación individual por categorías, Martín Feijoo, do club Piragüismo Ourense, e Lena González, do Fluvial Avión-Castrelo de Miño, impuxéronse na categoría cadete masculina e feminina, respectivamente.
En Infantil A, os primeiros postos foron para Thiago Paz, do Piragüismo Ourense, e Vega Fernández, do Fluvial Avión-Castrelo de Miño. En Infantil B resultaron vencedores Gabriel Chávez e Isabella Rodríguez, ambos do Piragüismo Ourense.
Na categoría Benxamín A impuxéronse Guillermo Dacruz, do Fluvial Allariz, e Hannah Carvajal, do Piragüismo Ourense, mentres que en Benxamín B o triunfo foi para Mauro Quintas, tamén do Fluvial Allariz.
En Alevín A lograron a vitoria Nicolás Carbajal e Jara Paz, ambos representantes do Piragüismo Ourense. Pola súa banda, Asier Mora, do Fluvial Avión-Castrelo de Miño, e Ximena González, do Náutico Ribeiro, ocuparon o primeiro posto en Alevín B.
A categoría prebenxamín estivo encabezada por Mateo Foo e Maia Sophie Carbajal, ambos pertencentes ao club Piragüismo Ourense.
Na clasificación xeral por clubs, o primeiro posto foi para Piragüismo Ourense, seguido por Náutico Ribeiro e Fluvial Avión-Castrelo de Miño. A clasificación completárona S.C.D.X Fontefría (Muiños), Fluvial Allariz e Fluvial O Barco.