Deportes

Durante tres días, o recinto acolleu competicións, exhibicións e actividades abertas que reuniron asociacións, centros educativos e deportistas de todas as idades e capacidades

Expourense transformouse durante esta fin de semana nun auténtico punto de encontro deportivo coa celebración de Sportur Galicia – Xogos Deportivos, un evento que reuniu arredor de 4.000 participantes entre nenos, mozos e adultos, con e sen diversidade funcional.

Máis dunha vintena de asociacións deportivas participaron nun programa que incluíu clases abertas, exhibicións e competicións oficiais como as Copas Deputación de distintas modalidades. A ampla actividade converteu o recinto nunha gran pista multideporte na que se practicaron preto de vinte disciplinas distintas.

O pavillón principal, con 8.000 metros cadrados sen columnas, volveu demostrar a súa capacidade para acoller grandes eventos deportivos, permitindo a instalación simultánea de diferentes canchas e espazos de competición. Neste sentido, Expourense consolídase como unha infraestrutura de referencia para a celebración de campionatos autonómicos e nacionais.

As dúas primeiras xornadas estiveron centradas na participación de alumnado de Primaria e Secundaria de distintos centros da provincia de Ourense, mentres que o sábado quedou reservado ás competicións provinciais de todas as categorías. Foi unha xornada marcada polas medallas, os trofeos e as fotos de equipo.

Entre as probas destacaron a Copa Deputación de Minibalonmán e de Pequebolei, que reuniron centos de deportistas e familias ao longo do día, ademais de torneos de roller cross, bádminton e clases abertas de esgrima antiga.

A organización do evento correu a cargo de Expourense, co apoio da Secretaría Xeral para o Deporte da Xunta de Galicia e da Deputación de Ourense.

A programación de Sportur Galicia continuará os días 3 e 4 de decembro co VII Congreso Internacional sobre Turismo e Deporte, centrado no ámbito profesional.

Expourense pecha así a súa actividade feiral do primeiro semestre, aínda que manterá movemento nos próximos días coa presentación da Memoria de Actividades 2025 o 3 de xuño e coa celebración do Ou Yeah Fest o 6 de xuño, con actuacións de Kitty, Daisy & Lewis, The Rapants e Loquillo.