Melón pon en marcha un novo curso de actividade física e benestar a partir de outubro
O Concello de Melón puxo en marcha un novo curso de actividade física e benestar dirixido á veciñanza do municipio, co obxectivo de fomentar hábitos saudables, manter a actividade física e contribuír a unha mellor calidade de vida.
A iniciativa desenvolverase ao longo de dous días á semana, con contidos diferenciados segundo a xornada. Os martes estarán dedicados a actividades de relaxación, mentres que os xoves centraranse en exercicio físico orientado á saúde. Ambas as sesións terán lugar en horario de 18.00 a 19.00 horas.
O curso desenvolverase no Local Social do municipio e comezará o 1 de outubro.
As persoas interesadas en participar poderán formalizar a súa inscrición entre o 21 e o 30 de setembro nas dependencias da Casa do Concello.
Dende a organización advertiron de que as prazas dispoñibles son limitadas, polo que se recomenda non demorar a inscrición. Así mesmo, sinalouse que terán preferencia de acceso as persoas empadroadas no Concello de Melón.
O Concello anima á cidadanía a sumarse a esta proposta como unha forma de coidar a súa saúde e mellorar o seu benestar xeral.