Mercedes Peón chega este xoves a Barbadás co seu espectáculo 'Deixaas'
Barbadás abre esta semana unha das citas máis agardadas do seu Verán Cultural: o concerto de Mercedes Peón, que subirá ao escenario do Parque dos Patos da Valenzá ás 21.00 horas.
A artista, unha das voces galegas con maior proxección tanto no panorama nacional coma no internacional, presentará 'Deixaas', o seu último traballo discográfico. Enriba do escenario, Peón compartirá protagonismo con Ana Fernández e Mónica de Nut, nunha proposta que combina pandeireta, sintetizadores, piano, voz, saxofón e sons reais procedentes da construción naval, xunto á esencia máis pura do cante popular galego. O resultado é un espectáculo definido coma sobrecolledor e accesible, no que se entrelazan con mestría linguaxes sonoras moi distintas e estéticas facilmente recoñecibles.
A data confirmada responde ao cambio de calendario anunciado polo Concello, que decidiu mover a cita ata este xoves ante a previsión de choiva que ameazaba a sesión orixinal, buscando así garantir as mellores condicións posibles tanto para o público coma para os equipos técnico e artístico. O lugar e o horario, en todo caso, seguen a ser os habituais.