O Ateneo de Ourense organiza un torneo de xadrez en memoria de Xosé Henrique Rodríguez Peña
O Ateneo de Ourense volve render homenaxe a Xosé Henrique Rodríguez Peña coa celebración dunha nova edición do torneo que leva o seu nome. A entidade confirmou que a proba, denominada 'Aberto de Xadrez Activo Memorial Xosé Henrique Rodríguez Peña', terá lugar o vindeiro 10 de outubro de 2026.
A competición disputarase no Pavillón do Espazo Xove de Ourense, situado na rúa Celso Emilio Ferreiro número 17, baixo. O torneo comezará ás 16.30 horas dese sábado.
A organización corre a cargo do Ateneo de Ourense, que conta para esta iniciativa coa colaboración do Espazo Xove de Ourense e o Club Xadrez As Burgas.
En canto ao formato de xogo, o torneo será válido para o ELO Fide de partidas rápidas, polo que se rexerá polas Leis do Xadrez conforme ás normas específicas desta modalidade. Para poder participar será imprescindible dispor da licenza en vigor correspondente á presente tempada.
A proba desenvolverase ao longo de sete roldas, cun ritmo de xogo de 10 minutos máis 3 segundos de incremento por xogada e xogador. Os emparellamentos realizaranse por sistema suízo, empregando para iso o programa informático Vega.
Respecto á inscrición, a organización quixo destacar que será totalmente gratuíta. O prazo para apuntarse esténdese ata o 8 de outubro ás 24.00 horas. Quen desexe participar deberá enviar un correo electrónico ás direccións xadrezateneo@gmail.com ou xadrezasburgas@gmail.com, indicando nome, apelidos, club ao que pertence e ID de xogador.