Cultura

'Noitébrega', o primeiro traballo do músico carballiñés xunto á súa formación en trío, poderá escoitarse con entrada libre ata completar aforo

O Auditorio Municipal Manuel María do Carballiño acolle este sábado a presentación de 'Noitébrega', o novo disco do saxofonista carballiñés Alexandre Cabanelas. O concerto comezará ás 20.00 horas e o acceso será gratuíto ata completar o aforo da sala.

Cabanelas estará acompañado sobre o escenario polo Alexandre Cabanelas Trío, unha formación que se distingue doutras agrupacións de xazz por prescindir do contrabaixo habitual neste tipo de propostas. Xunto ao saxofonista actuarán Héctor Pérez á batería e Efrén Nóvoa ao baixo eléctrico, cun repertorio que combinará composicións propias con versións de temas clásicos do xazz.

Trátase, ademais, do primeiro traballo que o músico grava con esta formación en trío, e supón a súa presentación na súa localidade natal. A cita enmárcase dentro da colaboración coa Rede de Teatros e Auditorios de Ourense, e dende o Concello animouse á veciñanza a achegarse para descubrir a nova proposta do artista.