O baloncesto e a lectura dan a man para unir xeracións en Celanova
Celanova foi escenario, hai uns días, dunha iniciativa que combinou deporte e solidariedade interxeracional. Preto de 30 nenos e nenas de entre 6 e 16 anos, integrantes da Asociación Cultural e Deportiva BXL Celanova, desprazáronse ata a residencia de maiores San Carlos para compartir cos residentes unha sesión de lectura.
A proposta, que os organizadores esperan converter nunha actividade periódica, enmárcase na filosofía do clube baloncestístico, que aposta polo voluntariado sénior, o acompañamento solidario e o envellecemento activo como eixos da súa labor social máis alá da cancha.
Nesta tarefa colaboran de forma desinteresada Leo Rodríguez e Teresa Devesa, dous docentes xubilados recentemente que poñen á disposición do proxecto a experiencia acumulada tras toda unha traxectoria no ensino público.
Segundo indican desde a organización, o encontro foi recibido con entusiasmo tanto polos mozos deportistas como polos maiores do centro, o que reforza a intención de dar continuidade a este tipo de actividades no futuro.