O BNG de Ourense acusa a Jácome de “dilapidar” preto de 3 millóns de euros na compra dos “busitos”
O Grupo municipal nacionalista responsabiliza ao alcalde de Ourense de “empecinarse” e de “dilapidar” preto de 3 millóns de euros na compra duns vehículos “ruinosos, que non compren co seu cometido e que acumulan continuas avarías e queixas da veciñanza e das traballadoras e traballadores do Servizo” polo que anuncia a presentación dunha moción para o Pleno de abril na que pedirán a súa reprobación.
Desde o primeiro momento en que o Alcalde Gonzalo Pérez Jácome propuxo a compra directa por parte do Concello dunha nova flota de autobuses para o Servizo de transporte público, o Grupo municipal do BNG amosou as súas dúbidas sobre se era a mellor fórmula posible. Ditas dúbidas acrecentáronse e convertéronse en rexeitamento no momento no que se coñeceu a tipoloxía dos vehículos que se pretendían mercar.
O Portavoz do BNG Luís Seara lembra que “unha vez superado o debate sobre a compra dos autobuses, coa que nós non coincidíamos pois considerábamos máis acaído incluílos no prego de licitación do Servizo e en todo caso ter definido previamente o novo mapa de liñas para coñecer as necesidades reais a cubrir, o que nos chamou poderosamente a atención é o modelo de vehículos escollidos”.
Seara di que “nunca cuestionamos os 10 buses eléctricos ou os 15 diésel mercados a empresa ourensá UNVI mais si os 15 busitos, xa que todas as referencias que tiñamos e as experiencias existentes noutros lugares con este tipo de vehículos xa eran de sobra coñecida e por certo, nada positivas”.
Pese ás advertencias e ás dúbidas sobre a idoneidade e a calidade dos chamados “busitos”, Luís Seara afirma que “non sabemos porqué motivo, ou si, Jácome empecinouse na súa compra, dilapidando preto de 3 millóns de euros de todas e todos nuns autobuses que son unha auténtica estafa”.
E é que desde a súa entrada en funcionamento, en decembro de 2023, son constantes as avarías sufridas e relativas a fallos nas aperturas das portas, no sistema de calefacción e aire acondicionado, nas ramplas, nos paneis luminosos ou nos acabados interiores, chegando ao punto de desprenderse partes do mesmo, “por non falar da escasa capacidade que teñen, o que provoca que haxa momentos nos que usuarias e usuarios teñan que quedar nas paradas por falta de espazo”.
A maior abastanza, os nacionalista sosteñen que “máis da metade dos mesmos atópanse continuamente avariados e aparcados unha nave en Quintela, co que iso supón para a correcta prestación do servizo e para as arcas municipais en canto ao pagamento das reparacións”.