O BNG denuncia que decenas de familias volven quedar sen axuda de comedor escolar en Ourense pese a ter ingresos mínimos
O comezo dun novo curso escolar volve deixar, segundo denuncia o BNG, a decenas de familias ourensás sen acceso á axuda municipal de comedor, pese a cumprir cos requisitos esixidos e contar con ingresos inferiores a 333 euros mensuais. Dende a formación nacionalista aseguran que se trata dunha situación que se repite curso tras curso sen que o goberno local adoptase medidas para solucionala.
O grupo municipal do BNG leva tempo insistindo na necesidade de reforzar os comedores escolares públicos, pedindo que se amplíen as partidas orzamentarias municipais dedicadas a estas axudas e que se eleven os limiares de renda per cápita que permiten acceder a elas. A concelleira nacionalista Rhut Reza defendeu que estas axudas deberían enmarcarse dentro das políticas educativas e reclamou subir o límite actual, fixado en 4.000 euros anuais de renda per cápita.
A edil advirtiu de que nenos e nenas de familias con rendas mínimas quedarán sen poder facer uso do comedor escolar ao non recibir a axuda municipal, e cuestionou a xestión do goberno local nesta materia, ao que acusou de desatender os servizos sociais. Reza sinalou que aumentou o número de fogares que teñen dificultades para chegar a fin de mes —incluídos aqueles nos que os seus membros contan con emprego—, xa que o alugueiro e os gastos enerxéticos absorben boa parte dos ingresos, un contexto ante o que, ao seu xuízo, o goberno municipal non está a dar resposta.
A concelleira do BNG foi tallante ao sinalar que este tipo de decisións prexudican a quen menos recursos ten, e esixiu ao goberno municipal que dote de crédito suficiente as partidas destinadas ás axudas de comedor, de xeito que ningunha familia que cumpra os requisitos quede sen recibila. Así mesmo, reclamou revisar os limiares de renda per cápita para ampliar a cobertura destas axudas a máis fogares en situación de vulnerabilidade. A edil concluíu afirmando que, ao seu parecer, se trata dun erro que se repite dende hai unha década sen que o goberno local fose capaz de resolvelo.