O BNG propón asumir directamente a xestión dos dispositivos de control telemático contra a violencia machista
A cabeza de lista do BNG por Ourense, Noa Presas, defendeu a necesidade de fortalecer os recursos públicos destinados á protección das vítimas de violencia machista. Nun encontro con mulleres celebrado na cidade ourensá, a candidata expuxo a proposta de que Galiza asuma a xestión pública e directa dos dispositivos de control telemático, ademais de incorporar as melloras técnicas necesarias para solucionar os problemas de cobertura e evitar situacións de revitimización.
Presas advertiu de que o avance de posicións machistas, tanto no ámbito internacional como na contorna máis próxima, require unha resposta centrada en ampliar dereitos e reforzar as políticas de igualdade. Ao seu xuízo, non se poden dar pasos atrás nin permitir que os mecanismos creados para protexer as mulleres acaben provocándolles máis inseguridade.
"A violencia machista é o problema máis importante que temos que afrontar como sociedade e non podemos permitir que os instrumentos que deben protexer as mulleres acaben xerándolles máis inseguridade ou obrigándoas a revivir situacións de angustia", afirmou a representante nacionalista. Por iso, insistiu en que os sistemas de control telemático deben funcionar con todas as garantías, sen interrupcións na cobertura e cunha atención adaptada ás necesidades das vítimas.
A candidata considerou que esta protección debe estar baixo a responsabilidade directa das administracións. "Non podemos deixar en mans de terceiros un servizo esencial como a protección da vida e da integridade das mulleres. Defendemos unha xestión pública e directa, con medios suficientes, para dar resposta a esta lacra e garantir que os dispositivos cumpran a súa encomenda", manifestou.
A proposta enmárcase, segundo indicou, na defensa de políticas feministas ambiciosas que permitan continuar avanzando en dereitos. Presas asegurou que o BNG levará esta posición ao Congreso para evitar que ningunha muller quede atrás.
Na súa intervención, a cabeza de lista tamén reivindicou o papel do movemento feminista galego na conquista de dereitos e espazos que durante moito tempo lle foron negados ás mulleres. Lembrou que os avances acadados son froito da mobilización e da loita colectiva, e non concesións, e advertiu de que aínda persisten desigualdades e discriminacións que cómpre superar.
A candidata incidiu en que esta reivindicación cobra especial importancia nun momento no que, segundo sinalou, se está a producir un rearme do machismo, polo que considerou necesario manter e intensificar a defensa da igualdade e dos dereitos das mulleres.