O BNG rexeita a externalización anunciada polo Concello de Ourense dos traballos do PEP-OU
Este xoves celebrouse no Concello de Ourense, logo de tres anos sen facelo e pese ás reiteradas solicitudes formuladas ao longo deste tempo tanto polo BNG como polo resto de Grupos da Oposición, unha nova reunión da Comisión de seguimento do PEP-OU.
O Portavoz municipal da formación nacionalista e membro da Comisión Luís Seara sinalaba ao remate da mesma que “o que se nos trasladou é que o Goberno vai externalizar os traballos de redacción do proxecto e que a partir de ahí xa se irá vendo”. Seara deixa clara a postura do BNG a este respecto, “nós estamos radicalmente en contra da externalización dos traballo” e engade, “houbo un traballo moi bo feito polos técnicos da casa, nomeadamente os da Oficina de Rehabilitación (PERI) que desmantelou este Goberno Local, polo tanto é materialmente imposible que cando desmantelas a oficina e estás reducindo medios humanos os traballos podan avanzar en tempo e forma”.
Seara bótalle en cara ao Executivo local que “nos últimos tres anos non se tivera convocada a Comisión, o que deriva nesta situación de impás e agora ao Goberno éntranlle as presas e decide retomalos a través dunha empresa externa e gastando preto de 400.000 euros”.
O Grupo municipal do BNG ten claro que “os mellores para facer este traballo son os técnicos da desmantelada oficina do PERI por unha razón fundamental, porque son os que coñecen a realidade da cidade e en particular a realidade da zona histórica polo que desde o noso punto de vista teñen o aval en canto a coñecementos, profesionalidade e capacidade para poder desenvolver un proxecto destas características”.