O campus de Ourense pechou a primeira edición dun curso pioneiro sobre termalismo e saúde
O campus de Ourense acolleu a pasada semana o peche da primeira promoción do Curso de Experto/a en Auga, Termalismo e Saúde, unha titulación propia da Universidade de Vigo vinculada ao Centro de Posgrao e Formación Permanente e desenvolvida no marco do Campus Auga.
Un total de 14 persoas completaron esta formación ao longo do curso 2025/2026, procedentes de perfís profesionais diversos, nun programa orientado a afondar nos usos terapéuticos e cosméticos da auga mineral-medicinal e termal.
O itinerario formativo combinou contidos teóricos e prácticos, cunha estrutura de 20 créditos ECTS, 136 horas entre docencia presencial e en liña e 60 horas de prácticas en empresas. Ao longo do curso tratáronse cuestións como a composición e dinámica da auga, a súa protección como recurso, a análise microbiolóxica e química, así como a normativa aplicable.
Tamén se abordaron aspectos relacionados coa saúde da pel e a aplicación das augas en diferentes patoloxías en función das súas características físico-químicas, ademais das distintas técnicas de uso terapéutico.
Desde a organización destácase que esta formación está orientada a capacitar profesionais no ámbito do benestar e a saúde, incorporando o potencial das augas termais como recurso aplicado.
A diversidade de perfís do alumnado foi outro dos elementos salientados nesta edición, con participantes procedentes de ámbitos como a medicina ou a farmacia, o que permitiu un enfoque interdisciplinar e o intercambio de coñecemento entre sectores.
No acto de clausura participaron responsables académicos da Facultade de Ciencias, a coordinación do curso e representantes do campus, que puxeron en valor o carácter innovador desta proposta e o seu potencial desenvolvemento futuro como mestrado.
Tamén se subliñou a importancia desta primeira promoción como punto de partida dun proxecto formativo chamado a consolidarse no tempo dentro da estratexia do Campus Auga.