O campus de Ourense promove un programa para achegar o románico galego á cidadanía
Un equipo da Facultade de Historia do campus de Ourense da Universidade de Vigo, integrado polo profesor Victoriano Nodar e o investigador predoutoral Diego Fernández, participa no proxecto “Redescubre o Románico de Galicia”, promovido pola Fundación Santa María la Real e co apoio de Redeia e da Consellería de Cultura, Lingua e Xuventude da Xunta de Galicia.
O proxecto busca achegar o románico galego á cidadanía mediante formatos dixitais e presenciais, como un curso online, podcasts, acceso á Enciclopedia del Románico e un seminario presencial.
Desde a Facultade de Historia do campus de Ourense, os dous investigadores participan na elaboración dos contidos do MOOC, centrados na investigación, documentación e preparación dos materiais audiovisuais. Ademais, tamén interveñen como relatores no seminario e colaboran na súa organización.
O curso en liña, dispoñible a partir do 20 de maio, estrutúrase en tres bloques temáticos: o románico compostelán, o románico e os mosteiros, e o denominado “Arte 1200”, que aborda o final do estilo e o seu máximo esplendor. O contido inclúe referencias á construción da catedral de Santiago, á escultura románica, á iconografía monástica e á difusión de correntes estilísticas como a mateana ou a hispano-borgoñona, con especial atención á catedral de Ourense.
No plano presencial, o seminario “Redescubre o Románico de Galicia” desenvolverase os días 20 e 21 de maio en Santiago de Compostela e Ourense. A programación inclúe conferencias de especialistas en arte medieval, visitas guiadas e sesións dedicadas á expansión do románico en Galicia. A primeira xornada terá lugar en San Martín Pinario, mentres que a segunda se trasladará ao Arquivo Histórico Provincial de Ourense, con relatorios centrados na Ribeira Sacra e no monacato galego.