O Carballiño entra na recta final do prazo para pedir o desconto do 50 % no balneario
A convocatoria de axudas termais que impulsa o Concello do Carballiño, a través da Concellería de Termalismo que dirixe Elvira Torres, entra esta semana nos seus últimos días de prazo. Quen aínda non tramitase a súa solicitude dispón ata o vindeiro 24 de setembro para facelo, xa sexa de forma telemática a través da sede electrónica municipal ou de xeito presencial no Rexistro Xeral do Consistorio.
O programa subvenciona ao 50 % tres circuítos termais no Gran Balneario. O máis sinxelo, dun só día, combina baño de hidromasaxe con inhalación ou parafango por 12 euros, a mesma cantidade que achega o Concello. O segundo, de dúas xornadas, suma ducha circular a eses tratamentos por 22 euros, fronte aos 44 habituais. E o terceiro, de tres días, incorpora ademais un baño estático con sales e masaxe parcial ou descarga de pés, cun custo final de 34,50 euros grazas á achega municipal.
Para optar á axuda cómpre ser maior de idade e estar empadroado no Carballiño cunha antigüidade mínima de doce meses. Unha vez pechado o prazo, o Concello comunicará por correo electrónico ás persoas admitidas a súa participación no programa, aínda que a inscrición non garante praza de forma automática: o desconto aplicarase ata esgotar o crédito dispoñible. Quen resulte finalmente beneficiario ou beneficiaria poderá desfrutar da bonificación ata o 5 de decembro de 2026 ou ata que se esgote a partida orzamentaria destinada a esta iniciativa.