O Club Ximnasia Pavillón acada un cuarto posto no Campionato Galego Escolar de Pontevedra
Os conxuntos do Club Ximnasia Pavillón participaron este sábado no Campionato Galego Escolar celebrado en Pontevedra, onde competiron con dez equipos nunha xornada marcada por resultados variados segundo as categorías.
Na sesión da mañá, os conxuntos sénior non tiveron unha actuación especialmente acertada, o que condicionou a súa clasificación. Pola súa banda, os equipos infantís melloraron o seu rendemento, destacando o infantil pequeno, que rematou no posto 15 entre 25 participantes.
Tamén pola mañá debutaron na competición os conxuntos prebenxamíns de Ourense e Ribadavia, conseguindo este último a mesma posición, o posto 15.
Xa pola tarde, o protagonismo foi para a categoría iniciación, que asinou un excelente resultado ao lograr o cuarto posto, quedando a moi pouca distancia do podio. Na categoría cadete, varios erros nos exercicios provocaron unha baixada na puntuación final. A xornada completouse coa participación dos dous equipos alevíns do club.
A seguinte cita para os conxuntos do Club Ximnasia Pavillón, así como para aqueles que non lograron a clasificación para esta fase final escolar, será en Celanova o próximo sábado, na final da Copa Deputación.