O COB presenta a cuarta edición do seu campus de verán Basketcamp
O Club Ourense Baloncesto presentou este xoves, 4 de xuño, a cuarta edición do seu campus de verán Basketcamp COB-BBALL, nun acto celebrado na sala de prensa do Pazo dos Deportes Paco Paz. Durante a comparecencia déronse a coñecer os principais detalles desta nova convocatoria, xa consolidada dentro da programación estival do club.
No acto estiveron presentes o representante da Deputación de Ourense e responsable do seguimento dos Obxectivos de Desenvolvemento Sostible e da Axenda 2030, Jorge Pumar; o presidente do Club Ourense Baloncesto, Diego González Regueira; o xogador do primeiro equipo Isaac Vázquez; e o coordinador da canteira do COB-BBALL, Diego Seara.
Durante a presentación salientouse o papel fundamental que desempeña a canteira no proxecto deportivo do club e na cidade, destacando a súa evolución nos últimos anos e o crecemento continuo dun modelo formativo que segue gañando peso temporada tras temporada.
Un dos aspectos destacados desta edición é a organización de horarios pensados para favorecer a conciliación das familias. O campus contará con servizo de atención temperá desde as 08:30 horas, media hora antes do inicio das actividades, e prolongarase ata as 14:00 horas.
O programa tamén incluirá a presenza de deportistas convidados, entre eles o propio Isaac Vázquez, exemplo da canteira ourensá, e outras figuras destacadas do baloncesto como Paula Ginzo, xogadora da Selección Española, que compartirán experiencias cos máis novos.
O campus está dirixido a nenos e nenas nados entre 2009 e 2018, que terán a oportunidade de iniciarse no baloncesto, mellorar a súa formación e coñecer de preto referentes do deporte, ademais de optar a formar parte da canteira do club nas vindeiras tempadas.
Desde o Club Ourense Baloncesto agradeceuse publicamente o apoio da Deputación de Ourense pola súa colaboración e implicación no desenvolvemento desta iniciativa.
As inscricións para o Basketcamp COB-BBALL xa están abertas e poden realizarse a través do formulario habilitado polo club. Para máis información ou consultas, o contacto dispoñible é o correo electrónico: cantera@clubourensebaloncesto.com.