O Concello avisa de cortes de tráfico esta noite pola celebración do ascenso da UD Ourense
A Policía Local do Concello de Ourense informou da posta en marcha dun dispositivo especial de tráfico con motivo da celebración do ascenso da Unión Deportiva Ourense á Primeira Federación. As restricións afectarán á contorna da Praza de Concepción Arenal a partir das 22:00 horas desta noite.
Segundo o plan previsto, realizaranse cortes á circulación en varios puntos da cidade para facilitar o desenvolvemento dos actos e garantir a seguridade dos asistentes. En concreto, quedarán pechadas ao tráfico a Avenida da Habana á altura da confluencia con Xoán XXIII, a rúa Sáenz Díez no cruce con Samuel Eiján e a Glorieta do Mundo na intersección con Pardo de Cela.
O operativo poderá implicar tamén axustes puntuais na mobilidade da zona durante o transcurso da celebración, polo que se recomenda á cidadanía planificar os desprazamentos e empregar itinerarios alternativos.