O Concello de Ourense axustará o PXOM para adaptalo ao informe da Xunta
A Xunta de Goberno Local do Concello de Ourense deu luz verde este luns, nunha sesión extraordinaria e urxente, á modificación do contrato co equipo encargado da redacción do Plan Xeral de Ordenación Municipal (PXOM), co obxectivo de incorporar as observacións recollidas nun informe recente da Xunta de Galicia.
O encargo recae na empresa Oficina de Planeamiento S.A., responsable da elaboración do documento urbanístico desde a súa adxudicación inicial en 2008 e a formalización do contrato en 2009.
A modificación aprobada supón a realización de traballos adicionais para axustar o documento de aprobación provisional do PXOM ás indicacións emitidas pola Dirección Xeral de Urbanismo da Consellería de Vivenda e Planificación de Infraestruturas o 13 de xuño de 2025.
Esta ampliación do contrato implica tamén un incremento económico de 92.879,31 euros, dos que 76.759,76 corresponden ao importe base e 16.119,55 ao IVE. O prazo estimado para desenvolver esta adaptación é de dous meses.
Os traballos organizaranse en dúas fases, que inclúen unha primeira versión da documentación e unha posterior redacción definitiva. O pagamento á empresa realizarase ao final de cada unha destas etapas, aboándose o 50% do importe en cada caso.
Co acordo adoptado, o executivo municipal incorpora formalmente estes axustes ao proceso de planificación urbanística co fin de avanzar na tramitación do PXOM conforme aos criterios establecidos pola administración autonómica.