O Concello de Ourense e Aspamadis exploran vías de colaboración para reforzar a inclusión laboral
O Concello de Ourense estuda novas fórmulas de colaboración con entidades sociais para avanzar na inclusión sociolaboral das persoas con discapacidade. Neste contexto, a concelleira de Asuntos Sociais, Tamara Silva Cid, mantivo unha reunión de traballo con Manuel Martín e Elena Rodríguez, representantes da asociación Adido e do seu Centro Especial de Emprego de iniciativa social Aspamadis.
O encontro permitiu coñecer en detalle a actividade que desenvolven estas entidades e abordar posibles liñas de cooperación institucional centradas na inserción laboral de persoas con discapacidade intelectual.
Durante a reunión, os responsables das organizacións explicaron os diferentes programas que impulsan e trasladaron información sobre algúns dos servizos que actualmente realiza a súa empresa sen ánimo de lucro no municipio. Entre eles figuran actuacións ambientais relacionadas coa limpeza e co desbroce en diferentes puntos da cidade, como O Palao-Velle, As Madornas-Castro de Beiro e O Cumial.
Pola súa banda, Tamara Silva expresou a disposición do Concello a continuar fortalecendo a colaboración con este tipo de entidades, destacando o papel que desempeñan no ámbito social e laboral da cidade e recoñecendo o traballo que desenvolven en Ourense.