O Concello de Ourense valida o pagamento de débedas a concesionarias de auga e limpeza
A Xunta de Goberno Local de Ourense aprobou esta mañá, nunha sesión extraordinaria e urxente, convalidar a omisión do control previo de Intervención e dar validez a gastos xa comprometidos en dous acordos plenarios adoptados os días 29 e 30 de decembro de 2025.
Con esta decisión, o Concello poderá proceder ao pagamento das cantidades pendentes ás empresas que xestionan os servizos de auga e limpeza na cidade.
No caso do servizo de auga, xestionado pola empresa Viaqua, convalídase un importe de 16.170.069,06 euros correspondente á débeda acumulada pola prestación do servizo de abastecemento, saneamento e depuración de augas residuais ata o 31 de decembro de 2024.
Pola súa banda, a empresa Ecourense UTE recibirá 8.547.462,91 euros polos custos do servizo de limpeza viaria e recollida e transporte de residuos sólidos urbanos, correspondentes ao período comprendido entre abril de 2022 e setembro de 2024.
Na mesma sesión, a Xunta de Goberno aprobou tamén a rectificación dun erro material nun acordo do 23 de abril relacionado co pagamento de dúas facturas do servizo de centro de día que xestiona a asociación Aixiña.