O Concello de Pereiro de Aguiar chama a facer un consumo responsable da auga potable para evitar restricións no abastecemento
O Concello do Pereiro de Aguiar fai un chamamento á veciñanza para que reduza o consumo de auga potable debido ao forte incremento da demanda provocado pola actual vaga de calor, unha situación que, segundo advirte, está a poñer en risco a capacidade de garantir o abastecemento a toda a poboación.
Co obxectivo de asegurar a subministración para o consumo humano e evitar que sexa necesario aplicar restricións, o Concello estableceu unha serie de limitacións sobre os usos non esenciais da auga potable.
Entre as medidas adoptadas figura a prohibición de empregar auga da rede para o rego de xardíns e cultivos. Tamén quedan prohibidos os baldeos e a limpeza de pavimentos con auga potable.
Así mesmo, non estará permitido utilizar auga potable para encher piscinas nin para a limpeza de vehículos mentres se manteña esta situación.
Desde o Concello insístese na importancia de facer un uso responsable da auga para garantir o abastecemento da poboación durante este período de elevadas temperaturas.