O Concello prevé rematar hoxe as obras en Curros Enríquez e Xoán XXIII e continuará mañá en Pena Trevinca
O Concello de Ourense continúa co plan de mellora do firme en diferentes rúas da cidade e prevé rematar ao longo da xornada de hoxe as actuacións iniciadas no eixe formado polas rúas Curros Enríquez, Concello e Xoán XXIII.
Os traballos arrancaron esta mañá e, segundo informou o Concello, desde as 11.00 horas quedou habilitado ao tráfico un carril na confluencia entre as rúas Concello e Curros Enríquez. Na actualidade, as actuacións continúan na rúa Xoán XXIII, no tramo situado detrás da Subdelegación do Goberno, que permanecerá pechado ata a finalización das obras, prevista para este mesmo día.
A programación continuará mañá, martes, coa pavimentación da rúa Pena Trevinca, nun tramo comprendido entre Serra de Queixa e a intersección coa estrada da Granxa e a rúa Emilia Pardo Bazán. Os traballos comezarán ás 06.00 horas.
Con motivo desta actuación estableceranse cambios na circulación. A rúa Pena Trevinca quedará configurada cun único sentido descendente, mentres que os vehículos que necesiten acceder en sentido ascendente serán desviados pola rúa Serra de Queixa.
Ademais, desde hoxe o Concello iniciou as tarefas de valado e reserva das zonas de estacionamento en Pena Trevinca para facilitar o acceso e o movemento da maquinaria encargada do asfaltado.
O calendario de actuacións continuará o mércores 8 de xullo coa pavimentación da rúa Vicente Risco, no tramo comprendido entre a avenida de Marín e a Praza de Xeneral Moscardó. O xoves 9 de xullo os traballos trasladaranse á rúa Emilia Pardo Bazán, que permanecerá pechada ao tráfico durante a execución das obras.