O Pazo Paco Paz acolle este sábado a última xornada da 42ª Copa Deputación de Judo
O vindeiro sábado, 30 de maio de 2026, o Pazo Paco Paz de Ourense será o escenario da terceira e última xornada da 42ª Copa Deputación de Judo, unha cita que se celebrará na pista central a partir das 10.30 horas e que reunirá arredor de 200 participantes de toda a provincia.
A competición, considerada a máis importante do calendario provincial, pecha así unha edición composta por tres xornadas puntuables, nas que a asistencia foi un factor clave para a clasificación final. O torneo está organizado pola Delegación Ourensá de Judo e conta co patrocinio íntegro do servizo de Deportes da Deputación de Ourense.
As categorías abranguen desde Chupetín, para menores de 18 quilos, ata a categoría xuvenil. Ademais, mantense a modalidade OPEN, na que compiten conxuntamente deportistas masculinos e femininos. Nesta última xornada decidiranse os podios definitivos de cada categoría tras a suma de puntos das distintas probas.
Participarán judokas de clubs da cidade, así como das escolas de Cambeo, Inmaculada e Baños de Molgas, nunha xornada que supón o peche da tempada provincial de judo formativo.
Ao remate da competición realizarase a entrega de medallas a todos os participantes, coa presenza do asesor de Política Deportiva da Deputación de Ourense, Diego Enrique Álvarez. Tamén está previsto un recoñecemento especial ao xornalista Pepe González, do programa Ser Deportivos da Cadena SER Ourense, polo seu apoio continuado aos deportes de artes marciais desde os inicios desta iniciativa.
A Copa Deputación de Judo acada así a súa 42ª edición, consolidada como unha das competicións de formación máis lonxevas da provincia, ideada polo mestre de judo 8º Dan Manuel Montero.