O polideportivo de Barbadás será ampliado cun investimento de máis de 1,2 millóns de euros
O polideportivo municipal de Barbadás será obxecto dunha ampliación e reforma integral que contará cun investimento superior a 1,2 millóns de euros. As obras aproveitarán a cuberta do edificio actual para erguer unha nova planta que substituirá as pistas de pádel existentes por un ximnasio de 263 metros cadrados, unha sala polivalente de 130 metros cadrados e dous novos vestiarios completos con duchas. Tamén se habilitará unha zona exterior cuberta para adestramento ao aire libre e mellorarase a accesibilidade do edificio coa instalación dun ascensor e a ampliación da escaleira actual.
O proxecto contempla, ademais, diversas medidas de eficiencia enerxética, como a substitución da caldeira de gasóleo por bombas de calor de alta eficiencia, a instalación de paneis solares térmicos e a mellora do illamento térmico do inmoble. No seu conxunto, prevese reducir o consumo enerxético do polideportivo en máis dun 30 %.
A actuación conta cunha achega de máis de 612.000 euros da Xunta de Galicia, a través da convocatoria de proxectos estratéxicos do fondo adicional do Fondo de Cooperación Local, o que supón a metade do investimento total. Así o comprobou este mércores en Barbadás o conselleiro de Presidencia, Xustiza e Deportes, Diego Calvo, acompañado pola directora xeral de Administración Local, Natalia Prieto, e o delegado da Xunta en Ourense, Manuel Pardo.
Calvo subliñou que este tipo de axudas a investimentos estratéxicos permite á Xunta colaborar cos concellos na execución de actuacións de especial relevancia para os municipios. Esta liña de axudas, posta en marcha en 2024, levou o Goberno galego a incrementar este ano a súa dotación ata os 10 millóns de euros, despois de que nas dúas primeiras convocatorias se destinasen máis de 16 millóns de euros a preto de 40 proxectos.
Unha vez rematadas, as obras permitirán incorporar no polideportivo novas actividades moi demandadas, como spinning, pickleball, cachibol, fitness boxing ou cross met, e posibilitarán ofrecer polo menos 20 sesións semanais adicionais de clases dirixidas. Tamén se poderá ampliar o horario da sala de musculación e liberar a pista central para incrementar o tempo dispoñible destinado ás escolas deportivas municipais e aos clubs locais.
O conselleiro destacou tamén o compromiso do Goberno galego cos concellos, xa que só o ano pasado o seu apoio permitiu impulsar preto dun milleiro de proxectos a través das distintas liñas de colaboración coas entidades locais. No caso de Barbadás, o Concello recibiu nos últimos anos máis de 1 millón de euros a través destas diferentes liñas de apoio.