O PP pide a Jácome que corrixa as deficiencias técnicas do PXOM

O Grupo Municipal do Partido Popular de Ourense quixo responder ás declaracións do goberno local, encabezado por Gonzalo Pérez Jácome, sobre a tramitación do novo Plan Xeral de Ordenación Municipal (PXOM). A voceira popular, Ana Méndez Gil, explicou que a Xunta de Galicia mantén toda a vontade de que a cidade conte canto antes cun novo planeamento urbanístico, aínda que insistiu en que a súa aprobación debe cumprir as mesmas condicións técnicas que se esixen ao resto de concellos galegos.
Nesa liña, a dirixente popular defendeu que todos os municipios deben someterse a idénticos requisitos normativos, sen que caiban excepcións para o caso ourensán. Ao seu xuízo, a cidade necesita renovar o seu planeamento con urxencia, pero sen que iso supoña rebaixar as esixencias técnicas habituais.
Desde o PP remarcan que os defectos detectados nos informes técnicos poden corrixirse e que, en ningún caso, implican o bloqueo definitivo do plan. Entre os problemas sinalados atópanse as contradicións detectadas entre os distintos documentos que integran o PXOM, como as memorias, as ordenanzas e os planos de clasificación e ordenación do solo. Segundo os populares, estas discrepancias deben subsanarse para dar seguridade xurídica á concesión de licenzas urbanísticas, algo que afecta tanto ao persoal técnico e funcionario municipal como aos propietarios dos terreos.
A iso súmase que o estudo económico do plan recolle valores de referencia con trece anos de antigüidade, o que, advirten, podería poñer en risco a viabilidade económica das actuacións previstas. Os populares tamén reclaman actualizar a cartografía das redes de servizos urbanísticos xa existentes —abastecemento e saneamento, entre outras— co fin de xustificar de forma adecuada a clasificación do solo urbano.
Méndez Gil subliñou que se trata de aspectos esenciais para a planificación de calquera cidade, xa que non tería sentido aprobar un documento que sitúe unha infraestrutura nun punto do territorio onde realmente non existe. Para a voceira, o que se reclama ao Concello é un documento correcto, actualizado e xuridicamente seguro para os veciños.
Por outra banda, os informes tamén apuntan a carencias na protección do patrimonio arquitectónico, etnográfico e arqueolóxico. O catálogo de bens protexidos incluiría fichas con información incorrecta ou incompleta, non xustificaría adecuadamente a retirada de elementos que si figuraban no catálogo anterior, e presentaría deficiencias na protección do patrimonio arqueolóxico e do tramo da Vía da Prata do Camiño de Santiago ao seu paso pola cidade.
Finalmente, a voceira popular insistiu en que a Xunta non está a frear a tramitación do PXOM, senón sinalando os aspectos que deben corrixirse para que poida aprobarse con todas as garantías. “O que ten que facer Jácome é deixar de buscar culpables, facer ben as cousas e remitir a documentación correctamente”, afirmou, ao tempo que reiterou que Ourense necesita un novo plan xeral canto antes, pero elaborado con rigor.