O PXOM de Ourense entra nunha nova fase tras remitirse á Xunta as correccións reclamadas
O Concello de Ourense remitiu á Xunta de Galicia a documentación coa resposta ao informe previo á aprobación definitiva (IPAD) do Plan Xeral de Ordenación Municipal (PXOM), co obxectivo de continuar avanzando na súa tramitación.
A documentación foi enviada o 12 de agosto, despois de completar o proceso de resposta ao informe emitido pola Dirección Xeral de Urbanismo da Consellería de Vivenda e Planificación de Infraestruturas o 13 de xuño de 2025. Este documento identificaba os erros que podían ser corrixidos e establecía as modificacións necesarias para que o PXOM puidese obter un informe favorable.
Para abordar estas cuestións, sinalan desde o consistorio, o equipo redactor do plan e o concelleiro delegado de Urbanismo, Francisco Lorenzo, mantiveron reunións de traballo coa Dirección Xeral de Urbanismo, acompañados polos técnicos municipais. Nestes encontros analizáronse os cambios que debían incorporarse á documentación.
O equipo redactor presentou a documentación definitiva o pasado 31 de xullo de 2026 e, posteriormente, os técnicos municipais do Servizo de Planeamento e Xestión Urbanística encargáronse da súa validación. Unha vez revisado o documento, a Concellería aprobou a súa remisión á Xunta. Agora, tras completar a correspondente dilixencia administrativa, o Concello enviou finalmente a documentación o pasado 12 de agosto.
Con este trámite, continúa o proceso de aprobación do PXOM de Ourense. O documento deberá completar agora os trámites legais que correspondan antes de poder ser sometido á aprobación definitiva do Pleno municipal.