O proceso electoral ao decanato de Dereito en Ourense remata sen candidaturas
A convocatoria realizouse tras completarse os tres anos de mandato do equipo decanal actual, encabezado pola profesora Susana Álvarez, da Área de Filosofía do Dereito. Segundo o calendario electoral previsto, este luns formalizouse a proclamación definitiva de candidaturas, constatándose que o proceso quedaba deserto.
Ante esta situación, será de aplicación o regulamento electoral xeral da Universidade de Vigo, que establece que, no caso de non presentarse propostas para órganos unipersoais, a persoa que ocupaba o cargo deberá continuar en funcións ata a convocatoria dun novo proceso electoral nun prazo máximo de seis meses. No caso de non ser posible a continuidade, o regulamento prevé o nomeamento doutra persoa docente do centro segundo criterios de antigüidade.
O equipo decanal da Facultade de Dereito, en funcións desde febreiro de 2023, continuará polo tanto ata a celebración dun novo proceso electoral. Está liderado por Susana Álvarez e integrado por Francisca Fernández Prol, vicedecana de Organización Académica; Lourdes Borrajo, vicedecana de Calidade; e María Belén Sánchez, secretaria e coordinadora de Relacións Internacionais. Completa o equipo Mónica Siota, responsable da coordinación do grao, e María Dolores Fernández Fustes, coordinadora do Mestrado Universitario en Avogacía e Procuradoría.