Política | Sociedade

Convocarase proximamente o órgano municipal encargado de actualizar os criterios destas axudas, mentres o servizo de comida a domicilio esgota xa as súas prazas dispoñibles e as axudas de emerxencia social afrontan centenares de solicitudes pendentes con fondos limitados

O grupo municipal socialista valorou de xeito positivo os avances trasladados durante a última reunión da área de Servizos Sociais do Concello de Ourense, en relación con varias reivindicacións que as súas concelleiras veñen defendendo de maneira reiterada ao longo deste mandato, tanto no Pleno como neste órgano de seguimento.

A voceira do PSdeG, Natalia González, subliñou en particular a confirmación por parte do goberno local de que nas vindeiras datas se convocará o Consello Municipal de Servizos Sociais, co obxectivo de abordar a elaboración dunhas novas bases para as axudas de libros, material escolar e comedor. Segundo explicou, estes criterios levan anos sen actualizarse a pesar de que xa non responden á realidade actual das familias.

Dende o grupo socialista lembran que, na última convocatoria deste curso, arredor do 78 % das solicitudes presentadas para libros e material escolar quedaron sen atender: de máis de 700 peticións rexistradas, só 152 familias resultaron beneficiarias. No caso das axudas de comedor, outras 77 solicitudes permaneceron en lista de espera.

Por iso, González insistiu en que a petición do PSdeG non se limitaba a unha solución puntual, senón a modificar de fondo o modelo destas axudas, con criterios adaptados á situación actual e dotación económica suficiente. Considera que o anuncio de que se abrirá ese proceso, con participación de profesionais e entidades do sector, supón un avance relevante, aínda que insiste en que as novas bases deberán prepararse con marxe de tempo e orzamento adecuado.

Outro dos asuntos tratados foi o servizo de Xantar na Casa, sobre o que os socialistas tamén presentaron iniciativas no Pleno e reclamaron de forma insistente en distintas reunións deste órgano, ante a existencia de persoas en lista de espera. Tras a modificación do convenio coa Xunta de Galicia e a ampliación do servizo, o goberno local confirmou que as 100 prazas actualmente dispoñibles están xa cubertas e que hai outras catro persoas pendentes de acceder a el.

Para González, estes datos confirman que a demanda deste recurso segue en aumento, motivo polo cal o PSOE propón que o Concello comece xa a traballar para que, de cara a 2027, o servizo poida ampliarse ata as 150 prazas. A voceira socialista defende que, se a ampliación recente ata as 100 prazas xa se atopa no límite, non convén esperar a que se acumule de novo unha lista de espera significativa para actuar, senón anticiparse e planificar o seguinte reforzo.

Na mesma liña abordouse a situación das axudas de emerxencia social. Segundo os datos facilitados na reunión, a data de 9 de setembro quedaban dispoñibles 105.000 euros para facer fronte a 467 solicitudes pendentes de resolución. O grupo socialista remarcou que se trata de persoas que atravesan situacións especialmente complicadas e que non admiten demoras, polo que anunciou que respaldará a modificación orzamentaria que o goberno local deberá levar ao Pleno para reforzar esta partida.

Dende o PSdeG tamén valoraron positivamente que se atope xa en fase de borrador o novo regulamento do Fogar do Transeúnte, outra das demandas que o grupo formulara con anterioridade. Os socialistas pediran expresamente que a actualización desta normativa se realizase contando primeiro cos profesionais e o persoal do centro, para abrirse despois ás achegas dos grupos políticos. Segundo a información trasladada, o borrador está á espera de pecharse coas traballadoras sociais e o persoal do servizo antes de someterse á participación dos grupos municipais, co obxectivo de que o novo regulamento poida quedar aprobado e en funcionamento antes de que remate 2026.

González concluíu sinalando que o grupo municipal socialista continuará coa mesma dinámica mantida durante todo o mandato: vixiar os problemas detectados, formular propostas concretas e facer seguimento delas ata que se traduzan en solucións. Aínda que amosou satisfacción por que varias das súas propostas estean a impulsar melloras nos servizos públicos, remarcou que aínda queda traballo pendente.