O pulpo á feira do Carballiño protagoniza a festa gastronómica da localidade italiana irmandada coa vila
O prato máis emblemático do Carballiño volveu ser protagonista en terras italianas. A Fiera del Folpo, celebrada en Noventa Padovana, localidade irmandada coa vila do Arenteiro dende 2024, reuniu a milleiros de persoas arredor do pulpo e da música, nunha cita que comezou o xoves e remata hoxe.
Até alí desprazouse a concelleira de Servizos Sociais do Concello carballiñés, Silvia Baranda, quen tamén exerce como pulpeira, co obxectivo de preparar o pulpo á feira e dar a coñecer a tradición culinaria da localidade galega. A iniciativa tivo unha excelente acollida entre o público asistente, repetindo así o éxito acadado o ano anterior, cando outros pulpeiros carballiñeses xa tomaran parte nesta cita italiana.
O vínculo entre ambos os concellos foise consolidando dende 2024, coa gastronomía como eixe central dunha relación que busca pór en valor este tipo de tradicións como parte do patrimonio e a identidade dos pobos. De feito, a reciprocidade entre ambas as localidades tamén se fixo visible este mesmo ano: unha delegación procedente de Noventa Padovana estivo presente na Festa do Pulpo do Carballiño, onde dispuxo do seu propio posto para amosar a súa gastronomía.
O concelleiro de Turismo, Manuel Dacal, puxo en valor os beneficios que está a xerar esta relación entre ambas as localidades: “Estamos moi agradecidos de todo o que nos está a aportar este irmandamento: unión, promoción e apoio mutuo”.