Ourense estrea un novo parque infantil na Praza Taboada Chivite
A Praza Taboada Chivite conta desde esta mañá cun novo espazo de lecer e deporte despois da inauguración dun parque integral que transforma unha parcela en desuso nunha área con xogos infantís e pista deportiva.
A actuación permitiu recuperar unha zona que permanecía abandonada e convertela nun novo punto de encontro para a veciñanza do barrio. O recinto combina unha área infantil destinada a nenos e nenas de entre 3 e 12 anos cunha pista deportiva equipada cunha cancha de baloncesto.
Ao acto asistiron o alcalde de Ourense e o concelleiro de Urbanismo, quen destacaron que esta intervención responde a unha demanda histórica da asociación veciñal da zona. “Era unha obra moi demandada á que se lle prometeu solución moitas veces, pero que aínda non se puido executar. Hoxe vemos o resultado: unha zona totalmente abandonada reconverteuse nun espazo vital para o barrio, combinando un parque infantil e unha pista deportiva”, sinalou o rexedor durante a visita ás instalacións.
O equipamento infantil foi instalado pola empresa HPC Ibérica e destaca polo uso de aceiro inoxidable como principal material de fabricación, unha elección orientada a garantir unha maior resistencia, durabilidade e seguridade, ademais de facilitar o mantemento das instalacións a longo prazo.
Coa posta en marcha desta nova infraestrutura, o Concello asegura que continúa avanzando na mellora dos servizos nos distintos barrios da cidade e na creación de espazos públicos accesibles, modernos e pensados para o uso da cidadanía.