Ourense pecha un treito da rúa do Progreso e fixa servizos mínimos para o día do Magosto e a folga xeral
Ourense prepárase para celebrar este mércores, 11 de novembro, a Festa do Magosto 2026, unha cita que combinará a tradicional degustación gastronómica con actuacións musicais en varios puntos do centro. A xornada, porén, coincidirá cunha folga xeral convocada en toda España, o que levou a establecer tanto un dispositivo especial de tráfico como uns servizos mínimos obrigatorios nos departamentos municipais.
Programación mantida a pesar da choiva
O Concello confirmou que conserva na súa totalidade o programa de actos deseñado para esta edición do Magosto, que ten recoñecida a declaración de interese turístico e que se organiza coa colaboración da Xunta de Galicia e ABANCA. Ante a previsión de choiva, decidiuse ampliar o número de carpas para que o público poida desfrutar con comodidade tanto da proposta gastronómica como dos espectáculos musicais.
Instalaranse estruturas cubertas na Praza Maior e Santa Eufemia, na rúa do Progreso (á altura da Alameda), na rúa do Bispo Cesáreo e na avenida de Pontevedra, ás que se sumarán as carpas habituais destinadas ao bar e ao punto de reparto de castañas. O único cambio respecto ao plantexamento inicial é a supresión do porco ao espeto, mantendose o resto de propostas tal e como estaban previstas.
A xornada arrincará ás 18.00 horas na Praza Maior e na rúa do Progreso, xunto á Alameda, co tradicional magosto: chourizo asado acompañado de bolo de masa nai, auga ou viño, por un prezo de 3 euros. Tamén haberá degustación gratuíta de castañas e callos. A esa mesma hora, na Praza Maior, comezará o Festival Folk San Martiño, coas actuacións dos grupos Ialma e Brañas Folk, que contarán coa colaboración de Pancho Álvarez, Susana Blanco e o cuarteto de zanfonas Zarandela, dirixido por Germán Díaz. Xa pola noite, entre as 19.00 e as 22.00 horas, a rúa do Progreso acollerá o baile amenizado pola orquestra Los Satélites.
Corte total na rúa do Progreso
Para facer posible esta programación, pecharase por completo o tráfico rodado na rúa do Progreso desde as 13.30 horas, no treito comprendido entre o acceso á baixada cara á Praza de Abastos e o cruzamento coa rúa da Concordia. O autobús urbano procedente de Tras Alameda poderá desviarse de forma provisional cara a Xoán XXIII a través da rúa Parada Justel ata as 17.30 horas, momento no que esta vía tamén quedará pechada na súa totalidade. As restricións de tráfico e estacionamento manteranse activas ata que rematen os actos programados e quede despexada a calzada.
Mobilizacións pola folga xeral
A xornada do 11 de novembro coincidirá ademais con varias manifestacións e concentracións autorizadas na vía pública, convocadas con motivo da folga xeral. Estas protestas terán lugar ás 10.00, ás 11.00 e ás 18.00 horas, polo que non se descartan cortes puntuais, desvíos circulatorios de carácter conxuntural e retencións en distintos puntos da cidade, en función do itinerario que sigan os manifestantes. Entre as vías que poderían verse afectadas por estas mobilizacións atópanse a glorieta de San Rosendo, a propia rúa do Progreso, Xoán XXIII, Curros Enríquez e a avenida da Habana.
Servizos mínimos nos departamentos municipais
Co obxectivo de compatibilizar o exercicio do dereito á folga cos dereitos da cidadanía e o mantemento dos servizos públicos fundamentais, o Concello aprobou un decreto que fixa os servizos mínimos obrigatorios para esta xornada, tendo en conta ademais que coincide cun festivo local marcado pola celebración do Magosto.
A resolución, baseada nos informes da Dirección Xeral e da Xefatura do Servizo de Recursos Humanos, concreta as dotacións e as porcentaxes de persoal que deberán permanecer en activo nas distintas áreas municipais. O Servizo de Prevención, Extinción de Incendios e Salvamento contará cunha dotación completa de 11 funcionarios, dos que polo menos un exercerá funcións de mando. En Benestar Social, concretamente no Fogar do Transeúnte, manterase o 50 % do persoal, mentres que na área de Saúde, referida aos cemiterios municipais, a porcentaxe será do 25 %.
No Servizo de Cultura permanecerán en funcións o xefe do servizo, dous operarios, dous conserxes e un animador sociocultural. Pola súa banda, Alcaldía manterá unha funcionaria ou funcionario adscrito á área de Protocolo, e en Servizos Xerais prestarán servizo dous alguacís.
Segundo establece o decreto, serán os responsables de cada servizo quen designen o persoal encargado de cubrir estes mínimos, ademais de velar polo seu correcto cumprimento durante a xornada de folga.