Paderne de Allariz ultima os preparativos do seu obradoiro sobre prevención das violencias
O Concello de Paderne de Allariz afronta a recta final antes da celebración, este xoves 29 de outubro, do 'Obradoiro de Prevención das Violencias', unha actividade formativa incluída no programa 'CIM Móbil' (Centro de Información ás Mulleres), que percorre distintos concellos ofrecendo atención, asesoramento e acompañamento en materia de igualdade.
O obradoiro terá lugar na Casa do Concello en horario de 10.30 a 12.00 horas, e está aberto a todas as persoas interesadas en afondar sobre a prevención das distintas formas de violencia.
A iniciativa conta coa organización e colaboración de varias entidades: a Xunta de Galicia, o Pacto de Estado contra a Violencia de Xénero, o Ministerio de Igualdade —a través da Secretaría de Estado de Igualdade e para a Erradicación da Violencia contra as Mulleres, dependente da Delegación do Goberno contra a Violencia de Xénero— e o Xacobeo 2027.
Quen aínda queira obter máis información ou inscribirse no obradoiro pode poñerse en contacto a través do WhatsApp 685 21 18 82 ou do correo electrónico dos Servizos Sociais do Concello de Paderne de Allariz.