Preto de 1.200 persoas participarán este domingo na Carreira Nocturna do Couto
A Carreira Nocturna do Couto reunirá este sábado a preto de 1.200 persoas participantes en Ourense, nunha nova proba integrada no circuíto “Correndo por Ourense”, organizado polo Consello Municipal de Deportes.
A proba celebrarase o 30 de maio de 2026 ás 22.00 horas na rúa Dalí. As saídas organizaranse por categorías, comezando ás 22.00 horas cos Pitufos (nados en 2019 e posteriores). Ás 22.05 horas será a quenda das categorías Sub10 (2017-2018) e Sub12 (2015-2016). Ás 22.15 horas sairán as categorías Sub14 (2013-2014) e Sub16 (2011-2012), mentres que ás 22.30 horas competirán as categorías Sub18 (2009-2010) e Absoluta (2008 e anteriores).
Esta proba forma parte do circuíto “Correndo por Ourense”, que comezou no mes de abril no barrio do Vinteún e que continuará ao longo do ano con novas citas como a proba do Centro o 6 de xuño, o Trail Oira-San Tomé o 28 de xuño, Mariñamansa o 6 de setembro, A Ponte o 27 de setembro e A Carballeira o 18 de outubro.
A celebración da carreira implicará a posta en marcha dun dispositivo especial de tráfico por parte da Policía Local de Ourense, co obxectivo de garantir a seguridade do evento. Os cortes aplicaranse de forma progresiva a partir das 20.30 horas, cando se pechará a rúa Dalí no tramo entre Remedios e Ervedelo. Ás 21.30 horas ampliarase o peche ao resto do percorrido, que inclúe as rúas Dalí, Ervedelo, Juan de Anges, Remedios e a rotonda cara a Antonio Puga.
Desde a mañá do sábado estará prohibido estacionar en puntos clave para a organización, como a parte superior da rúa Dalí, destinada á carpa de chegada, e a zona inferior da rúa Faustino Míguez, onde se instalará a carpa de avituallamento.
Para facilitar a mobilidade, estableceranse itinerarios alternativos en diferentes puntos da cidade, con desvíos desde vías como Doutor Fleming, Reza, Ervedelo, Greco e Bispo Lourenzo, ademais da habilitación provisional da Ponte Lebrona en sentido cara ao centro urbano. O tráfico na rúa Ervedelo canalizarase con conos entre a praza Sorolla e a praza da Chave, permitindo a circulación en sentido de entrada á cidade.