Ribadavia presenta o seu plan local de economía social centrado no sector agrario, vitivinícola, cultural e turístico
Ribadavia acolleu este mércores a presentación do seu Plan Local de Economía Social, un documento que inclúe unha diagnose da situación do municipio, ademais das principais liñas estratéxicas e actuacións prioritarias para impulsar este modelo económico na localidade ourensá.
O acto de clausura correu a cargo da directora xeral de Traballo Autónomo e Economía Social, Marta Mariño, quen destacou a relevancia de que os concellos conten con ferramentas propias para dinamizar a economía social, aproveitando os recursos e as oportunidades específicas de cada territorio.
Esta presentación enmárcase nun proxecto piloto posto en marcha pola Xunta de Galicia para acompañar aos concellos galegos na elaboración deste tipo de plans, co obxectivo de detectar as oportunidades propias de cada zona e deseñar medidas axustadas ás súas características sociais, económicas e produtivas. A iniciativa dá continuidade á presentación, semanas atrás, do plan equivalente elaborado para o municipio de Baiona.
No caso concreto de Ribadavia, a responsable autonómica subliñou o carácter participativo do proceso de elaboración do plan, no que colaboraron entidades sociais, cooperativas, asociacións, empresas da zona, persoas emprendedoras e outros axentes relevantes do territorio.
O documento pon especial atención nos sectores agrario, vitivinícola, cultural e turístico, actividades cun peso histórico e identitario destacado no municipio. Segundo se explicou durante a xornada, o plan busca contribuír ao avance da economía social mediante o fomento do emprendemento colectivo, a xeración e consolidación de emprego estable, e o reforzo do tecido produtivo local.
Por último, indicouse que o plan se aliña coa Estratexia galega de economía social horizonte 2027 e coa Estratexia de emprendemento ligado ao territorio de Galicia, dous marcos autonómicos orientados a favorecer un desenvolvemento económico equilibrado e adaptado ás capacidades propias de cada zona de Galicia.