Sácanse a licitación por 2,4 millóns de euros as obras de 12 vivendas públicas en San Cibrao das Viñas
A Consellería de Vivenda e Planificación de Infraestruturas sacou a licitación as obras de construción de 12 vivendas de promoción pública en San Cibrao das Viñas, cun orzamento de 2,4 millóns de euros. As vivendas ofreceranse en réxime de compra.
A conselleira de Vivenda e Planificación de Infraestruturas, María Martínez Allegue, presentou este anuncio, enmarcado no convenio de cesión gratuíta dos terreos asinado entre a Xunta e o Concello de San Cibrao das Viñas. Segundo explicou, ese mesmo día licitárase tamén a redacción do proxecto e a dirección de obra, traballo que recaeu na UTE AM2-Javier López Franco. Unha vez rematado o proxecto, e tres días despois de recibir a autorización do Consello da Xunta, procedeuse a licitar as obras propiamente ditas.
As empresas interesadas disporán de prazo ata o vindeiro 30 de outubro para presentaren as súas ofertas. Unha vez adxudicado o contrato, as obras contarán cun prazo de execución de 19 meses.
O proxecto prevé a construción dun inmoble de tres alturas que albergará vivendas de 2, 3 e 4 dormitorios, todas elas destinadas á venda. A responsable autonómica destacou que se trata dunha promoción que aposta por vivendas confortables, accesibles, luminosas, ben illadas e eficientes enerxeticamente, ademais de integradas na súa contorna e desenvolvidas baixo os criterios de calidade que promove a Xunta a través do selo Galicia Calidade.
Facilitar o acceso á vivenda
Martínez Allegue sinalou que San Cibrao das Viñas, polo seu crecemento poboacional e a súa media de idade nova, é un dos municipios que pode beneficiarse especialmente das medidas impulsadas pola administración autonómica en materia de vivenda. O sorteo das vivendas realizarase ante notario e, segundo indicou a conselleira, ofreceranse entre as persoas inscritas no Rexistro de Demandantes de Vivenda que estean empadroadas en San Cibrao das Viñas, ou ben que traballen no municipio e queiran fixar alí a súa residencia.
A conselleira subliñou que estas vivendas se beneficiarán das novas medidas postas en marcha para facilitar o acceso á vivenda pública. En concreto, o 30 % dos fogares reservarase para persoas de entre 36 e 45 anos con fillos ao seu cargo, mentres que o 25 % quedará reservado para menores de 36 anos.
Así mesmo, lembrou que a Xunta elevou os límites de renda ata 4 veces o IPREM, ou 4,5 veces no caso das familias numerosas, co obxectivo de que un maior número de familias poida optar a este tipo de vivendas.
Por último, a conselleira agradeceu a colaboración do Concello de San Cibrao das Viñas, un dos 17 municipios galegos que cederon gratuitamente solo á Xunta para impulsar a construción de vivenda pública, e puxo en valor a necesidade de seguir avanzando no traballo conxunto entre administracións e na colaboración co sector privado.