Concello

As actuacións centráronse na renovación integral de dous espazos centrais do municipio, con intervencións enfocadas na accesibilidade, a mellora das infraestruturas e a recuperación de elementos tradicionais

O Concello de San Cibrao das Viñas vén de rematar dúas actuacións clave para a mellora dos espazos públicos do municipio: a humanización da praza da Carballeira e a remodelación integral da praza de Fonteboa. Ambas intervencións, que suman un investimento conxunto de máis de 350.000 euros, forman parte da estratexia municipal para modernizar os núcleos urbanos e mellorar a calidade de vida veciñal.

As obras permitiron renovar por completo dous espazos centrais do municipio, con actuacións centradas na accesibilidade, a mellora das infraestruturas e a recuperación de elementos tradicionais, apostando por un modelo de espazo público máis amable e pensado para o uso peonil.

Na Carballeira, o Concello concluíu unha das actuacións máis destacadas da lexislatura, cun orzamento de 220.000 euros. O proxecto supuxo unha transformación integral da contorna mediante a renovación do pavimento en varias rúas e a reorganización da praza central, acadando unha imaxe máis ordenada e funcional. A actuación foi cofinanciada polo propio Concello e polo Plan Provincial de Cooperación 2025 da Deputación de Ourense.

Un dos aspectos máis relevantes desta obra foi o soterramento da rede de baixa tensión e das telecomunicacións, unha intervención técnica que permite eliminar o impacto visual do cableado e modernizar os servizos urbanos.

Tras visitar a zona, a alcaldesa de San Cibrao das Viñas, Marta Nóvoa, sinalou que o obxectivo do goberno municipal con estes traballos é “que cada recuncho do concello sexa un lugar onde dea gusto vivir” e engadiu que “queremos prazas para as persoas. Os veciños merecen unha contorna moderna e coidada”.

De xeito paralelo, o Concello completou a remodelación da praza de Fonteboa, cun investimento de 133.000 euros, financiado con fondos propios e coa colaboración da Xunta de Galicia. Os traballos centráronse na contorna da confluencia das rúas Fonteboa e Camiño da Auga e tiveron como eixe principal a mellora da convivencia e do uso cidadán do espazo.

A actuación incluíu a renovación do mobiliario urbano e da iluminación, a plantación de novo arborado e a instalación de bancos e papeleiras. Ademais, reconstruíuse o muro e o lavadoiro tradicional, integrándoos nunha nova praza deseñada baixo criterios de accesibilidade universal.

En relación con esta intervención, Marta Nóvoa destacou que “un espazo público de calidade é o mellor servizo que podemos ofrecer. Estas obras achegan seguridade aos nosos maiores e comodidade ás familias”. A alcaldesa subliñou tamén que “trátase de crear comunidade. San Cibrao avanza cara a unha humanización real, centrada no beneficio directo do veciño”.

Ambos proxectos foron deseñados co obxectivo de mellorar a seguridade e o confort, eliminando barreiras arquitectónicas e unificando niveis para facilitar o uso dos espazos por parte de toda a cidadanía. Desde o Concello destacan ademais a importancia da colaboración institucional para optimizar os recursos públicos.

Coa finalización destas obras, a Carballeira e Fonteboa consolídanse como exemplos do novo modelo urbano que impulsa o Concello de San Cibrao das Viñas, baseado na accesibilidade, a modernización dos servizos e a integración estética coa contorna. A alcaldesa concluíu afirmando que “seguiremos traballando coa mesma intensidade. O benestar dos nosos veciños no seu día a día é a nosa maior prioridade”.