Un incendio forestal en Riós afecta xa a unhas 30 hectáreas na parroquia de Fumaces e A Trepa
A Consellería do Medio Rural informa dun incendio forestal activo no concello ourensán de Riós, na parroquia de Fumaces e A Trepa, que segundo as últimas estimacións provisionais afecta unha superficie de arredor de 30 hectáreas.
O lume iniciouse este sábado ás 16.54 horas e, debido á súa proximidade ao núcleo de poboación de Fumaces, obrigou a decretar a Situación 2 como medida preventiva. Esta situación operativa de emerxencia foi desactivada esta mañá, segundo as últimas informacións facilitadas pola Consellería.
Para facer fronte ao incendio despregáronse ata o momento dous técnicos, 12 axentes, 17 brigadas, 13 motobombas, tres pas, tres helicópteros e sete avións.
Medio Rural lembra que a cidadanía pode comunicar a detección de incendios forestais a través do teléfono gratuíto 085. Para informar de maneira anónima sobre calquera actividade delituosa incendiaria da que se teña sospeita ou coñecemento está dispoñible tamén o número 900 815 085.