Un partido solidario en O Couto recadará fondos para unha entidade ourensá de esclerose múltiple e párkinson
O vindeiro mércores 16 de setembro, a partir das 20.30 horas, o estadio do Couto será escenario dun encontro de fútbol con fins solidarios organizado a favor de AODEMPER, a asociación ourensá que atende a persoas afectadas por esclerose múltiple, párkinson e outras enfermidades raras. A cita, baixo o lema "Xuntos polo que importa", deuse a coñecer esta mañá nunha presentación celebrada nas propias instalacións deportivas.
O partido enfrontará á Unión Deportiva Ourense cun equipo formado por xogadores da cidade procedentes de distintos clubs, cuxa coordinación estará a cargo de Javi Rey e Álvaro Selas. O acceso ao campo terá un prezo único de 5 euros, e ademais porase en marcha unha fila 0 pensada para quen queira sumar a súa achega aínda que non poida acudir ao estadio.
A iniciativa conta co apoio de varias entidades, entre elas o Concello da cidade, a Deputación Provincial e a Federación Galega de Fútbol, ademais doutras institucións que estiveron representadas no acto de presentación.
Durante a presentación do evento púxose en valor o labor que desenvolve AODEMPER en Ourense, así como a disposición amosada pola Unión Deportiva Ourense e polo resto de clubs que cederán aos seus xogadores para disputar o partido. Tamén se salientou que a cita busca, sobre todo, dar visibilidade á causa que representa a asociación.