Unha rotura na rede principal de abastecemento en Ribadavia obriga a cortar a auga mentres se repara a avaría
Produciuse unha rotura de importancia na rede principal de abastecemento de auga, en concreto á saída do depósito da ETAP, o que obrigou a interromper temporalmente o subministro para poder acometer a reparación necesaria.
Os equipos técnicos xa están a traballar na zona afectada e os labores continuarán durante toda a noite, co obxectivo de resolver a incidencia canto antes e recuperar a normalidade no servizo. Trátase dunha avaría que require unha intervención inmediata, sobre a que se está a actuar desde o primeiro momento.
Desde a organización responsable téñense presentes as molestias que un corte de auga ocasiona tanto nos fogares como nos establecementos, polo que se trasladaron desculpas á veciñanza e se agradece a súa comprensión ante a situación.
Irase informando puntualmente da evolución dos traballos, e comunicarase de inmediato en canto quede restablecido o subministro, unha vez completada a reparación. Neste momento, todos os medios dispoñibles están centrados en solucionar a incidencia coa maior rapidez posible.