Verea prepárase para unha nova edición da 'Ruta dos Fornos Bangueses'
Bangueses, no concello ourensán de Verea, vive a conta atrás para a cuarta edición da 'Ruta dos Fornos Bangueses', unha proposta que combina sendeirismo e gastronomía tradicional e que se celebrará dentro de dous días, o luns 12 de outubro.
A saída está fixada ás 09.30 horas na propia localidade. Trátase dun percorrido de dificultade intermedia, pensado para quen goza camiñando polo contorno rural e quere coñecer de preto este recuncho da provincia.
Un dos grandes atractivos da xornada chegará durante a marcha, cunha degustación de pincho de carne acompañado de pan recén feito nos fornos da zona. Ao rematar a andaina, quen o desexe poderá quedar a compartir mesa nun xantar.
Participar na andaina custa 5 euros e o xantar ten un prezo de 15 euros. Os nenos de ata 6 anos poden sumarse de balde.
A iniciativa conta coa organización da Deputación de Ourense e Inorde.