Xerando Redes +45 volve da man da Deputación de Ourense para impulsar o emprego das mulleres de máis de 45 anos
A Deputación de Ourense, en colaboración con Executivas de Galicia, pon en marcha a segunda edición de Xerando Redes +45, un programa orientado a mellorar as oportunidades profesionais e a empregabilidade das mulleres maiores de 45 anos da provincia.
Trátase dunha iniciativa totalmente gratuíta para as participantes, financiada pola institución provincial, e pensada tanto para mulleres en situación de desemprego como para aquelas que buscan mellorar a súa situación laboral actual.
Despois da boa resposta acadada na primeira edición, a Deputación decidiu manter o seu apoio a este proxecto co fin de dar resposta a unha problemática que afecta especialmente ás mulleres de máis de 45 anos, e de reivindicar ao mesmo tempo a súa experiencia e traxectoria profesional como un valor para o mercado laboral e a economía provincial.
Segundo os datos achegados pola organización do programa, as mulleres maiores de 45 anos representan na actualidade arredor do 60 % do paro feminino na provincia de Ourense. Xerando Redes +45 pretende contribuír a reverter esta tendencia, ofrecendo ás participantes ferramentas para reforzar as súas competencias, ampliar a súa rede de contactos profesionais e afrontar con máis recursos os procesos de procura ou mellora de emprego.
Desde a institución provincial destácase a importancia de aproveitar o talento existente na provincia e de evitar que a idade se converta nun obstáculo para o acceso ao emprego, especialmente nun colectivo que conta cunha importante experiencia e coñecemento acumulados.
Un programa formativo desenvolvido entre outubro e novembro
A segunda edición de Xerando Redes +45 terá lugar durante os meses de outubro e novembro de 2026, a través dun programa que combinará formación, acompañamento e creación de redes profesionais.
Entre as accións previstas inclúese formación práctica orientada á empregabilidade, con obradoiros presenciais e en liña sobre intelixencia emocional, imaxe persoal nos procesos de selección e elaboración de presentacións profesionais eficaces. O programa contempla tamén un ciclo de charlas e encontros centrados en aspectos de interese para a procura de emprego e o desenvolvemento profesional, como a optimización do currículo, o uso estratéxico das redes sociais e a intelixencia artificial, a educación financeira ou o emprendemento feminino.
Outro dos eixos do programa será o networking e a conexión profesional, promovendo o intercambio entre as participantes, integrantes de Executivas de Galicia e representantes do tecido empresarial ourensán, co obxectivo de compartir experiencias, xerar sinerxías e ampliar as redes de contacto.
Ao longo das distintas actividades, as participantes contarán co acompañamento de profesionais e integrantes de Executivas de Galicia, que compartirán a súa experiencia e coñecementos coas mulleres inscritas.
Poñer en valor o talento senior
A colaboración da Deputación neste programa enmárcase no obxectivo de favorecer a igualdade de oportunidades, a empregabilidade e o aproveitamento do talento presente na provincia, contribuíndo ademais a combater os prexuízos asociados á idade no ámbito laboral.
A experiencia, a madurez profesional e o coñecemento acumulado considéranse recursos valiosos tanto para as empresas como para o conxunto da economía provincial, polo que Xerando Redes +45 busca tamén reforzar a visibilidade deste talento e ofrecer ás participantes ferramentas adaptadas ás novas esixencias do mercado laboral.
O prazo de inscrición xa está aberto. As mulleres interesadas en participar ou que desexen obter máis información sobre o programa poden poñerse en contacto con Executivas de Galicia a través do correo electrónico proxectos@executivasdegalicia.org.