Turismo

Os datos da rede de albergues públicos amosan un descenso nas pernoctacións de xullo respecto a meses anteriores, aínda que o refuxio de Cea se mantén como o segundo con máis afluencia de toda a Vía da Prata en Galicia

Xullo confirmouse como o mes con menor número de peregrinos aloxados nos albergues públicos do Concello de San Cristovo de Cea, segundo os datos recollidos pola rede de albergues públicos de Galicia e polo propio Concello.

No albergue de Cea contabilizáronse 197 pernoctacións durante o mes, fronte ás 269 rexistradas en xullo de 2025. O albergue de Oseira, pola súa banda, sumou 78 pernoctacións, unha cifra lixeiramente superior ás 71 do mesmo mes do ano anterior. En canto ao Pavillón de Deportes, habilitado para acoller grupos, rexistráronse 320 pernoctacións, por riba das 255 contabilizadas en xullo de 2025.

A pesar deste descenso, o albergue de Cea mantense como o segundo de toda a rede da Vía da Prata en Galicia con maior número de peregrinos acollidos, só por detrás de 'A Laxe', en Lalín, que liderou o mes con 301 pernoctacións.

Con estas cifras, o promedio diario de peregrinos en xullo situouse en 19,83, unha media inferior á do mes de xuño, cando se alcanzaron os 25,7 peregrinos por día (o que supón unha caída de 5,87 puntos). Este promedio de xullo coincide co rexistrado no mesmo mes de 2025, tamén con 19,83 peregrinos diarios de media.

Dende a organización que recompila estes datos lembran que este ano é o previo a un Ano Santo, o que inflúe na comparativa con exercicios anteriores e futuros.

Os responsables desta recompilación de datos adiantan que, unha vez se consoliden as cifras de agosto e setembro, está previsto que o número de pernoctacións aumente, tal e como adoita ocorrer habitualmente neses meses.

Cómpre salientar que estes datos non inclúen as pernoctacións rexistradas en aloxamentos privados da zona, que previsiblemente tamén terán experimentado un incremento nas súas cifras durante este período.